Maşallah Əhmədovun işi: dövlət ittihamçısı sözünü dedi
Dekabrın 2-də dövlət ittihamçısı Bakı Ağır Cinayətlər Məhkəməsində mühakimə olunan məşhur futbolçu Maşallah Əhmədova 9 il azadlıqdan məhrumetmə cəzası verilməsini təklif edib. Xəbəri Report.az yayıb.
Futbolçu karyerasını bitirəndən sonra bizneslə məşğul olan Maşallah Əhmədov dələduzluqda ittiham edilir. İttihama görə, o, bir neçə şəxsə ümumilikdə 150 min manata yaxın ziyan vurub.
Ötən il dekabrın 17-də Binəqədi Rayon Məhkəməsi Maşallah Əhmədov barəsində 3 ay müddətinə həbs qətimkan tədbiri seçib. Futbolçu Bakı İstintaq Təcridxanasında saxlanıb, amma dekabrın 30-da ev dustaqlığına buraxılıb.
57 yaşlı Maşallah Əhmədov 1978-ci ildən 1989-cu ilədək Bakının “Neftçi” komandasında oynayıb. 1986-cı ildə o, SSRİ-nin ən güclü 3 hücumçusundan biri seçilib.
