Dövlət Neft Fondu noyabr ayında keçirilmiş valyuta hərraclarında satdığı vəsaitin məbləğini açıqlayıb. Rəsmi hesabata görə, ötən ay hərraclarda fonddan 301,5 milyon dollar məbləğində vəsait alınıb.
2 ildir manat devalvasiyaya uğrayır. Mərkəzi Bankın 21 fevral 2015-ci il qərarı ilə ABŞ dollarının rəsmi məzənnəsi 1 manat 5 qəpik müəyyən edilib. 21 dekabr 2015-ci ildən isə üzən məzənnə rejiminə keçilib və qiymət 1 manat 55 qəpiyə qalxıb. Hazırda kurs 1,7339 manatdır. 2015-ci ilin yanvar ayında dolların orta məzənnəsi 0,7844 manat idi.
Oktyabrın 5-dən Mərkəzi Bank valyuta hərracında yeni qayda tətbiq edir. Valyuta hərraclarının nəticələri ilə bağlı ətraflı məlumatların verilməsi dayandırılıb, hərraca çıxarılan və satılan vəsaitlərin məbləğləri hər ayın sonunda açıqlanacaq.
Novator.az xatırladır ki, bu yeniliyin tətbiqinə qədər Mərkəzi Bank özünün və Dövlət Neft Fondunun hərraclarda satdığı vəsaitin məbləğini hərrac günü açıqlayırdı. Sentyabrın 29-da açıqlanmış son məlumata görə, manatın məzənnəsini nizamlamaq üçün keçirilən valyuta hərraclarında 4 milyard 817,8 milyon ABŞ dolları həcmində vəsait satılmışdı. Bunun 3 milyard 882,4 milyon dolları Dövlət Neft Fondunun, 935,4 milyon dolları Mərkəzi Bankın payına düşmüşdü.
Oktyabr ayında isə Dövlət Neft Fondu valyuta hərraclarında 371 milyon ABŞ dolları məbləğində vəsait satıb.
