ABŞ prezidentliyinə Respublikaçılar Partiyasından milyarder iddiaçı Donald Tramp Demokratlar Partiyasından rəqibi, sabiq dövlət katibi Hillari Klintonla səs fərqini azaldıb.

Prezident seçkisi noyabrın 8-də olacaq. Həmin gün seçicilər 538 nəfərlik Seçicilər Kollegiyasının tərkibini müəyyən edəcək. Dekabrın 19-da Seçicilər Kollegiyası dövlət başçısını seçəcək, prezidentin adı 2017-ci il yanvarın 5-də açıqlanacaq. Prezident seçilmək üçün 270 səs kifayət edir.

Novator.az Abcnews.go.com-a istinadla bildirir ki, hazırda rəy sorğuları Klintonun 278 səs toplayacağını göstərir. Trampın 198 səsi var. 62 səsin taleyi qeyri-müəyyəndir.

10 gün öncə Klinton (307 səs) Trampı (180 səs) 127 səs qabaqlayırdı.

Prezident seçkisinə beş gün qalmış Tramp Klintonu Nevada və Arizona ştatlarında üstələyib. Bu, CNN telekanalı və ORC şirkətinin birgə keçirilən son sorğusunda bəlli olub. Sorğunun nəticələrinə əsasən, Klinton Florida və Pensilvaniyada öndədir.

Arizona ştatında respondentlərin 49 faizi Trampa, 44 faizi Klintona səs verməyə hazır olduqlarını bildirib. Nevadada isə seçicilərin 49 faizi milyarder namizədə, 43 faizi sabiq dövlət katibinə səs verməyə hazırlaşır.

Ənənəvi olaraq demokratlara üstünlük verən Pensilvaniya ştatında Klinton 48 faizlə rəqibini 4 faiz qabaqlayır. Floridada isə Klinton 2 faiz üstündür.