Amnistiya aktına dair yekun hesabat açıqlanıb
Milli Məclisin bu il mayın 20-də Respublika Günü münasibətilə verdiyi amnistiyanın icrası başa çatıb. AZƏRTAC-ın məlumatına görə, amnistiya aktı 10931 məhkuma şamil olunub. Onların 611-i qadın, 105-i yetkinlik yaşına çatmayan şəxslərdir.
Amnistiya qərarı azadlıqdan məhrumetmə yerlərində cəza çəkən 3573 məhkuma tətbiq edilib. 2901 məhkum azadlıqdan məhrumetmə cəzasından azad olunub, 634 məhkumun cəzasının çəkilməmiş müddəti 6 ay azaldılıb, habelə 38 hərbçi intizam xarakterli hərbi hissələrdən azadlığa buraxılıb.
Həmçinin 2 min manatadək məbləğdə cərimə cəzasına məhkum edilmiş və maddi vəziyyətinin çətinliyi ilə əlaqədar onu ödəyə bilməyən 2563 şəxs təxminən 2,7 milyon manat məbləğində cərimədən azad edilib. 2 min manatdan artıq məbləğdə cərimə cəzasına məhkum edilmiş və cərimənin 2 min manatdan yuxarı olan hissəsini ödəmiş şəxslər də amnistiyaya düşüb. Nəticədə dövlət büdcəsinə 472 min manatdan artıq məbləğdə vəsaitin ödənilməsi təmin olunub.
İslah işləri cəzasına məhkum edilmiş 4453 və ictimai işlər cəzalarına məhkum edilmiş 80 şəxs bu cəzalardan azad olunub. Şərti məhkum edilmiş, cəzasının çəkilməsi təxirə salınmış və cəzadan şərti olaraq vaxtından əvvəl azad edilmiş 231 məhkum barəsində də amnistiya tətbiq edilib.
