Əli Əhmədovun sədrliyi ilə yeni şura
Prezident İlham Əliyev Azərbaycan Respublikasının Dayanıqlı İnkişaf üzrə Milli Əlaqələndirmə Şurasının yaradılmasına fərman verib. Oktyabrın 6-da imzalanan fərmanda qeyd olunur ki, ölkə Birləşmiş Millətlər Təşkilatının üzvü olan dövlətlərin 2015-ci il sentyabrın 25-27-də keçirilən Dayanıqlı İnkişaf Sammitində 2016–2030-cu illər üçün təsdiqlənmiş Dayanıqlı İnkişaf Məqsədlərinə qoşulub: “Qarşıya qoyulmuş məqsəd və hədəflər dayanıqlı inkişafın iqtisadi, sosial və ekoloji aspektlərini əhatə etməklə Minilliyin İnkişaf Məqsədlərinə əsaslanır və növbəti inkişaf istiqamətlərini müəyyənləşdirir. Dayanıqlı İnkişaf Məqsədlərinin icrasının institusional və siyasi baxımdan kompleks yanaşma tələb etdiyini nəzərə alaraq Azərbaycanda daha dayanıqlı, əhatəli və şaxələndirilmiş iqtisadiyyatın inkişaf etdirilməsi, sosial sahələrin tarazlı inkişafının təmin edilməsi üçün səmərəli milli icra mexanizminin formalaşdırılması xüsusi əhəmiyyət kəsb edir”.
Dayanıqlı İnkişaf üzrə Milli Əlaqələndirmə Şurası yaradılması “Dünyamızın transformasiyası: 2030-cu ilədək dayanıqlı inkişaf sahəsində gündəlik”dən irəli gələn öhdəliklərlə bağlı dövlət orqanlarının üzərinə düşən vəzifələrin icrasının əlaqələndirilməsi məqsədilə əsaslandırılıb.
Baş nazirin müavini Əli Əhmədovun sədr, iqtisadiyyat naziri Şahin Mustafayevin sədr müavini təyin olunduğu şuranın üzvləri bu şəxslərdir:
Tahir Budaqov – Dövlət Statistika Komitəsinin sədri
Hicran Hüseynova – Ailə, Qadın və Uşaq Problemləri üzrə Dövlət Komitəsinin sədri
Vaqif Əliyev – mədəniyyət və turizm nazirinin birinci müavini
Mahmud Məmməd-Quliyev – xarici işlər nazirinin müavini
Elsevər Ağayev – səhiyyə nazirinin müavini
İdris İsayev – əmək və əhalinin sosial müdafiəsi nazirinin müavini
Ceyhun Bayramov – təhsil nazirinin müavini
Rauf Hacıyev – ekologiya və təbii sərvətlər nazirinin müavini
İntiqam Babayev – gənclər və idman nazirinin müavini
Seyfəddin Talıbov – kənd təsərrüfatı nazirinin müavini
Toğrul Musayev – ədliyyə nazirinin müavini
Fuad Hüseynov – Qaçqınların və Məcburi Köçkünlərin İşləri üzrə Dövlət Komitəsi sədrinin müavini.
Qurumun əsas məqsədi 2030-cu ilədək Azərbaycan üçün əhəmiyyət kəsb edən, qlobal məqsəd və hədəflərə uyğun milli prioritetləri və onlara dair göstəriciləri müəyyən etməkdən, ölkədə sosial-iqtisadi sahələri əhatə edən dövlət proqramlarının və strategiyaların Dayanıqlı İnkişaf Məqsədləri ilə uzlaşdırılmasını təmin etməkdən, habelə Dayanıqlı İnkişaf Məqsədlərinə nail olunması ilə əlaqədar illik hesabat hazırlamaqdan ibarətdir.
Şuranın fəaliyyətinin təmin edilməsi məqsədilə yaradılan katibliyin funksiyasının həyata keçirilməsi İqtisadiyyat Nazirliyinə həvalə edilib.
Novator.az bildirir ki, Əli Əhmədov 1953-cü ildə anadan olub. 1975-ci ildə Moskva Tarix İnstitutunu bitirib. Bakı Dövlət Universitetində müəllim, kafedra müdiri vəzifələrində çalışıb. Prezidentin İcra Aparatında şöbə müdirinin müavini, Xətai Rayon İcra Hakimiyyətinin başçısı, Milli Məclisin deputatı olub.
1999-cu ildən Yeni Azərbaycan Partiyasının icra katibi, 2005-ci ildən həmçinin YAP sədrinin müavinidir. Baş nazir müavini postunu 2013-cü il oktyabrın 22-dən tutur.
