Böyük britaniyalı təbiblər qadınların gecə növbəsində və iş saatından artıq işləməsinin döş xərçəngi riskinin artmasına gətirmədiyini müəyyən ediblər. Novator.az-ın məlumatına görə, mütəxəssislər Britaniyada 500 mindən çox qadının səhhətini müşahidə edib bu nəticəyə gəliblər.

2007-ci ildə Dünya Səhiyyə Təşkilatının məruzəsində bildirilib ki, gecə növbəsində işləmək bədənin bioritmində pozuntulara səbəb olur və xərçəng, o cümlədən döş xərçəngi riskini artırır. Ekspertlər müşahidəni yuxu pozuntuları olan heyvanlar üzərində apararaq belə nəticə çıxarıblar.

Böyük Britaniyanın Oksford Universitetinin alimi Rut Trevis və onun həmkarlarının yeni müşahidələri isə gecə növbəsində, o cümlədən iş vaxtından artıq çalışan qadınların döş xərçənginə daha çox meylli olmadığını göstərib. Mütəxəssislər qadınların səhhətinin müşahidəsi üzrə iri layihələri toplayaraq analiz ediblər. Bu layihələrdə səhhətləri həkim nəzarətində olan və gündəlik həyatı, işi ilə bağlı müntəzəm məlumatlar verən 800 minə qədər qadın iştirak edib.

Analiz göstərib ki, bu tədqiqatların heç birində gecə işi ilə xərçəng xəstəliyinin bağlılığı qeydə alınmayıb. Alimlər ABŞ, Çin, İsveç və Niderlandda aparılan bu növ tədqiqatların gedişində toplanan daha geniş məlumatları da araşdırıblar. Bu analizlər də xərçəng xəstəliyi ilə gecə növbəsinin heç bir bağlılığı olmadığını göstərib.

Mütəxəssislər bildirirlər ki,  Dünya Səhiyyə Təşkilatının heyvanlar üzərində aparılan müşahidələrdən əldə etdiyi nəticələrin insana aidiyyəti yoxdur və qadınlar xərçəng xəstəliyindən ehtiyat etmədən gecə növbəsində ürəklə işləyə bilərlər.