Birləşmiş Millətlər Təşkilatının Təhlükəsizlik Şurası yeni baş katiblə bağlı yekun qərar verib. Baş katib postuna portuqaliyalı Antonio Quterreş yeganə namizəd göstərilib. Namizədliyə BMT Baş Məclisi baxacaq.
Novator.az bildirir ki, 1949-cu ildə Lissabonda doğulan Antonio Quterreş Portuqaliya Sosialist Partiyasının baş katibi olub, ölkəsində baş nazir postunu tutub, Sosialist İnternasionalına, Avropa İttifaqı Şurasına başçılıq edib və BMT-nin qaçqınlar üzrə ali komissarı vəzifəsində çalışıb. İngilis, ispan, fransız dillərini bilir.
Antonio Quterreş ikinci beş illik müddətini başa vuran koreyalı diplomat Pan Gi Munu əvəz edərək BMT-nin 9-cu baş katibi olacaq, 2017-ci il yanvarın 1-dən vəzifəsinin icrasına başlayacaq.
Pan Gi Muna qədər BMT-nin baş katibi postunda bu şəxslər oturub: Trüqve Li, Daq Hammerşeld, U Tan, Kurt Valdhaym, Havyer Peres de Kuelyer, Butros Butros-Qali və Kofi Annan.
