Vergilər Nazirliyi www.taxfree.az saytını istifadəyə verib. İnternet səhifəsi Azərbaycan, ingilis və rus dillərində fəaliyyət göstərir.

“Tax Free” sistemi əcnəbilərin və vətəndaşlığı olmayan şəxslərin Azərbaycan ərazisində aldığı, istehsal, yaxud kommersiya məqsədləri üçün nəzərdə tutulmayan mallara görə ödədiyi əlavə dəyər vergisinin qaytarılmasını tənzimləyir.

www.taxfree.az səhifəsində “Tax Free” sistemindən yararlanmaq istəyən alıcılar üçün ƏDV-nin qaytarılması şamil olunmayan mallar, “Tax Free” stikeri olan mağazalarda malların satışının rəsmiləşdirilməsi, ƏDV-nin geri qaytarılması, habelə “Tax Free” sisteminə qoşulmuş ticarət obyektləri və digər məlumatlar yerləşdirilib.