Oktyabrın 6-da Bakının Xətai rayonunda yeni yaradılan “Sevirəm” park kompleksinin açılışı olub. AZƏRTAC xəbər verir ki, prezident İlham Əliyev, Heydər Əliyev Fondunun prezidenti Mehriban Əliyeva və fondun vitse-prezidenti Leyla Əliyeva açılışda iştirak ediblər.

Heydər Əliyev Fondunun icraçı direktoru Anar Ələkbərov yeni yaradılan park kompleksi barədə məlumatında bildirib ki, kompleksin ümumi ərazisi 3,2 hektardır. Ərazi geoloji işlərin nəticəsində aşkar edilən neft tullantıları və mərmər tozundan təmizlənəndən sonra 2016-cı ilin iyunundan parkın yaradılmasına və tikinti işlərinə başlanılıb. Burada işlər sentyabrda başa çatıb.

Uzunluğu 288 metr, eni 110 metr olan park kompleksinin üç girişi var.

Yaşıllaşdırma zamanı İDEA – Ətraf Mühitin Mühafizəsi Naminə Beynəlxalq Dialoq İctimai Birliyinin təşəbbüsü ilə parkda 4 mindən artıq müxtəlif növ ağac əkilib.

Parkda təbii daşlardan yonulmuş heykəllər qoyulub.

Prezident İlham Əliyev Bakının Nəsimi rayonunda yeni salınan “Qızılgül bağı” parkında yaradılan şəraitlə də tanış olub. Ümumi sahəsi 6300 kvadratmetr olan yeni park uzun müddət istifadə olunmayan Radio Mərkəzinin 1906-cı ildə inşa edilən binasının ərazisində salınıb.