3 ayda 3262 turist ödədiyi ƏDV-nin qaytarılmasını tələb edib
Oktyabrın 4-də “JW Marriot Absheron Baku” mehmanxanasında Vergilər Nazirliyi və digər dövlət qurumlarının iştirakı ilə Azərbaycanda elektron “Tax Free” sisteminin tətbiqi təqdim olunub. Sistem əcnəbilərin və vətəndaşlığı olmayan şəxslərin Azərbaycan ərazisində aldığı, istehsal, yaxud kommersiya məqsədləri üçün nəzərdə tutulmayan mallara görə ödədiyi əlavə dəyər vergisinin qaytarılmasını tənzimləyir.
Taxes.gov.az-ın məlumatına görə, təqdimatda bildirilib ki, qaydalara əsasən, ƏDV-nin qaytarılması aksizli mallara, ərzaq mallarına, dərman preparatları və tibbi ləvazimatlara, ölkənin mədəni-tarixi sərvəti hesab edilən, mədəni irsin qorunması üçün mühüm əhəmiyyət daşıyan mallara, ölkə daxilində satışı ƏDV-dən azad edilən mallara, ixracı üçün lisenziya tələb olunan mallara, çərçivəyə salınmamış, emal edilməmiş və ya çeşidlənməmiş qiymətli daşlara, külçə şəklində qiymətli metallara, müşayiət olunmayan baqajla Azərbaycan Respublikasının ərazisindən aparılan mallara, nəqliyyat vasitələri və onların ehtiyat hissələrinə, poçt və ya internet xidməti vasitəsilə ixrac edilən mallara şamil olunmur.
Qeyd olunub ki, “Tax Free” sisteminin tətbiqinə başlanmasından ötən 3 ay ərzində ölkəyə gələn əcnəbi turistlər ona böyük maraq göstəriblər və ümumilikdə 3262 turist ödənilmiş 487,4 min manat əlavə dəyər vergisinin geri qaytarılmasını tələb edib.
