Müsavat başqanının müavini Fərəc Kərimov azadlığa buraxılıb. Xəbəri oktyabrın 4-də “Tvitter” hesabında Müsavat başqanı Arif Hacılı yayıb.

Vəkil Nemət Kərimli xəbəri təsdiqləyərək Novator.az-a deyib ki, Fərəc Kərimov amnistiyaya düşüb.

Amnistiya aktını bu il mayın 20-də Milli Məclis qəbul edib. 28 May Respublika Günü ilə bağlı qəbul olunan amnistiya aktı iyunun 15-də qüvvəyə minib.

Fərəc Kərimov və onun bitərəf qardaşı Sirac Kərimli 2014-cü ilin iyulunda narkotik ittihamı ilə həbs ediliblər. Fərəc Kərimov 6,5 il, Sirac Kərimli 6 il müddətinə azadlıqdan məhrumetmə cəzasına məhkum edilib.

Sirac Kərimli 17 mart 2016-cı ildə əfv olunub.

Bu il mayın 24-də Ali Məhkəmə Fərəc Kərimovun cəzasını 3 ilə endirib.

Fərəc Kərimov 1985-ci il oktyabrın 12-də anadan olub. Orta təhsilini Laçın rayonunun 40 saylı orta məktəbində alıb. Azərbaycan Dövlət İqtisad Universitetini bitirib. Milli orduda, cəbhə xəttində hərbi xidmət keçib. Ehtiyatda olan zabitdir. Müsavatçı Gənclər Təşkilatının Nəzarət-Təftiş Komissiyasının sədri, partiyanın rəsmi internet səhifəsinin idarəçisi olub, bloqçu fəaliyyəti göstərib.

Həbsdə olan zaman, 2014-cü il sentyabrın 30-da Müsavat başqanının müavini təyin olunub.