Kamal Abdullanın yeni kitabı – “Düma ilə Coys arasında”
Romanları dünyanın aparıcı dillərinə tərcümə olunaraq xarici ölkələrdə çap edilən və çap olunduğu ölkələrin ədəbiyyat mükafatlarını alan Azərbaycanın görkəmli yazıçısı və alimi Kamal Abdullanın yeni “Düma ilə Coys arasında” adlı ədəbi-tənqidi esselər kitabı işıq üzü görüb.
“Mütərcim” nəşriyyatında çapdan çıxmış kitab giriş sözündən (Düma ilə Coys arasında “qara dəlik”), səkkiz fəsildən (I fəsil – “Birun-əndərun” oyunları, II fəsil – Sonsuz lüğət, III fəsil – Darıxan adamlar, IV fəsil – Don Kixotun ölümü, V fəsil – Aldanmış oxucu, VI fəsil – Yaşanmamış həyatın ilğımı, VII fəsil – Yol, VIII fəsil – Bermud üçbucağı) və son sözdən (Son söz və yaxud Qoca Rəmmal) ibarətdir.
Akademik İsa Həbibbəylinin “Düma ilə Coys arasında” haqqında yazdığı “Bir dünyalıq ədəbiyyat söhbəti, yaxud esselərdən ibarət roman” adlı məqaləsi də kitaba daxil edilib.
Kamal Abdulla kitabda məşhur italyan romançısı Umberto Eko ilə görüş təəssüratlarını, bu görüş əsnasında baş tutan ədəbiyyat söhbətlərinin ədəbi arealının Düma ilə Coys yaradıcılığı arasında cərəyan etdiyini, bu ədəbi məkanda Azərbaycan ədəbiyyatında, ədəbi tənqidində baş ədəbi prosesin yaratdığı assosiasiyalar, müasir Azərbaycan ədəbiyyatının gənc yazarlarının yaradıcılığındakı yeni parıltılar, müstəqillik dövründə qələmə alınan əsərlərlə bağlı düşüncələr, ədəbiyyatımızdakı “boşluq dolduranlar” haqqında fikirlərini ifadə edib. Kitabda irəli sürülən fikirlər müxtəlif məzmunlu ricətlərlə bağlanaraq daha da rəngarəng şəkil alıb.
Kamal Abdulla burada, həmçinin özünün yazdığı romanlarla bağlı müəllif, eyni zamanda bir oxucu kimi də münasibətini ortaya qoyub.
Kitabdakı “Birun-əndərun” oyunları” adlı essedə bədii mətnlərdəki söz oyunlarına, “Don Kixotun ölümü”, “Aldanmış oxucu” və başqa esselərində isə müəllif-əsər-oxucu uçbucağında baş verən proseslərə, bu üç faktor arasındakı münasibətlərə Kamal Abdullanın özünəməxsus münasibəti əksini tapıb.
