Xədicə İsmayılın tərcümə etdiyi kitabın təqdimatı olacaq
Məhbus jurnalist Xədicə İsmayılın ingiliscədən tərcümə etdiyi “Cakaranda ağacının uşaqları” romanının təqdimatı keçiriləcək.
Təqdimat mərasimi Bakıda, martın 13-ü saat 15:00-da Vətəndaş Həmrəyliyi Partiyasının qərargahında olacaq. Mərasimin təşkilatçısı NİDA Vətəndaş Hərəkatıdır. Tədbirdə kitabın satışı da təşkil ediləcək.
“Cakaranda ağacının uşaqları” romanının müəllifi Səhər Delicanidir. Romanda islam inqilabından sonra İranda siyasi fəallara qarşı aparılan repressiyalardan, onların ailələrinin qarşılaşdığı problemlərdən bəhs edilir.
Səhər Delicani 1983-cü ildə Tehrandakı Evin həbsxanasında doğulub. Həmin vaxt onun atası da, anası da siyasi motivlə həbsdə olub. Səhər 1996-cı ildə ailəsi ilə birlikdə ABŞ-a köçüb və Kaliforniyadakı Berkli Universitetində filologiya ixtisası üzrə təhsil alıb. “Cakaranda ağacının uşaqları” müəllifin ilk romanıdır. Bu roman 28 dilə tərcümə edilib və 75-dən çox ölkədə nəşr olunub. Əsər bir çox ədəbi mükafata layiq görülüb.
Səhər Delicani romanının azərbaycanca nəşrinə ön söz yazıb. Ön sözündə bildirib ki, əsərinin heç bir tərcüməsi onu Xədicənin tərcüməsi qədər təsirləndirməyib. Birincisi ona görə ki, onu azadlıq uğrunda çalışmalarına görə həbsdə olan mübariz bir insan tərcümə edib. İkinci səbəb də odur ki, Xədicə özü də bilmədən müəllifin əsərini onun ana dilinə tərcümə edib. Səhər Delicani yazıb: “Mənim anam Azərbaycan əsillidir. O, İranın Azərbaycan əyaləti olan Təbriz şəhərində anadan olub və sonradan doqquz yaşında ikən ailəsi ilə birgə Tehrana köçüb. Valideynlərimiz 1980-ci illərdə İran İslam Respublikasının həbsxanalarında olanda bizi böyüdən nənəm Aba farsca bilməzdi və bizimlə, nəvələri ilə ancaq azərbaycanca danışardı. Mən azərbaycanca, zəif olsa da, başa düşürəm və danışıram. Bu dil mənim üçün hər zaman doğmalıq, ailə, sevgi dili olub və heç bir başqa dil mənim qəlbimdə onun yerini tuta bilməz”.
“Cakaranda ağacının uşaqları” romanının azərbaycanca nəşrinin redaktoru Elnur Astanbəyli, kitabın üz qabığındakı rəsmin müəllifi Gündüz Ağayevdir.
Xədicə İsmayıl 2014-cü il dekabrın 5-dən həbsdədir. Bakı Ağır Cinayətlər Məhkəməsi 2015-ci il sentyabrın 1-də ona 7 il 6 ay azadlıqdan məhrumetmə cəzası kəsib. Bundan başqa o, 3 il müddətinə vəzifə tutmaq hüququndan məhrum edilib.
1976-cı ildə Bakıda anadan olan Xədicə İsmayıl 1997-ci ildə Bakı Dövlət Universitetini bitirib. Jurnalist fəaliyyətinə “Günaydın” qəzetində başlayıb, bir sıra KİV-lərdə, o cümlədən “Zerkalo”, “Exo” qəzetlərində, “Amerikanın səsi” radiosunda çalışıb. 2008-ci ildən “Azadlıq” radiosunda işləyib. 2008-2010-ci illərdə radionun Bakı bürosuna rəhbərlik edib.
