Martın 3-də Azərbaycan Aşıqlar Birliyi İdarə Heyətinin iclası keçirilib. ”Report” xəbər verir ki, mətbuat nümayəndələrinin buraxılmadığı iclasda birliyə yeni sədr seçilib. Sədr postunu Azərbaycan Aşıqlar Birliyinin birinci katibi Məhərrəm Qasımlı tutub.

Azərbaycan Aşıqlar Birliyinin əvvəlki sədri xalq şairi Zəlimxan Yaqub olub. Zəlimxan Yaqub 2016-cı il yanvarın 9-da vəfat edib.

Məhərrəm Qasımlı 1958-ci ildə Tovuz rayonunun Alakol kəndində anadan olub. Azərbaycan Dövlət Universitetinin filologiya fakültəsini bitirib. 1992-ci ildən Azərbaycan Milli Elmlər Akademiyasının Ədəbiyyat İnstitutunda elmi işlər üzrə direktor müavinidir. 2002-ci ildən həm də institutun şifahi xalq ədəbiyyatı şöbəsinə rəhbərlik edir. “Folklor və etnoqrafiya” jurnalının baş redaktorudur.

Məhərrəm Qasımlı Orxan Paşa təxəllüsü ilə şeirlər də yazır. “Sənə sözüm var” şeirlər kitabının müəllifidir.