“Monitor” jurnalının baş redaktoru Elmar Hüseynovun qətlə yetirilməsindən 11 il ötür.

Martın 2-də bir qrup jurnalist, ictimai-siyasi fəallar, söz azadlığı tərəfdarları mərhum jurnalistin məzarını ziyarət ediblər.

Ziyarət zamanı çıxış edən “Turan” informasiya agentliyinin rəhbəri Mehman Əliyev deyib ki, Elmar Hüseynov hər zaman ölkədə idarəetmənin yanlış olduğunu yazırdı. Belə idarəetmənin pozitiv nəticəsi olmayacağını bildirirdi: “Biz onun yazdıqlarının doğrulduğunu müşahidə edirik”.

Digər çıxış edənlər Elmar Hüseynovun xatirəsinin heç zaman unudulmayacağını bildirərək, ona rəhmət diləyiblər.

1967-ci ildə Bakıda anadan olan Elmar Hüseynov İnşaat Mühəndisləri Universitetini bitirib. Jurnalistikaya 1990-cı illərin əvvəllərində gəlib. Bir neçə rusdilli media quruluşunda çalışan Elmar Hüseynov daha sonra “Monitor” jurnalını təsis edib. Jurnal əvvəl ayda bir dəfə, sonra həftədə bir dəfə nəşr olunub.

Elmar Hüseynov 2005-ci il martın 2-də Bakıda odlu silahla qətlə yetirilib. İndiyədək qətlin üstü açılmayıb, cinayətin sifarişçiləri və icraçıları həbs edilməyib.

Mərhum jurnalistin xanımı Ruşaniyə Hüseynova 2006-cı ilin sonlarında oğlu Aslanla birgə Norveçə mühacirət edib.