Zəlimxan Yaqub torpağa tapşırıldı
Yanvarın 11-də Təzəpir məscidində müasir Azərbaycan ədəbiyyatının görkəmli nümayəndəsi, Prezidenti təqaüdçüsü, xalq şairi Zəlimxan Yaqubla vida mərasimi keçirilib.
Azərbaycan Respublikasının prezidenti İlham Əliyev mərasimdə iştirak edib.
Əvvəlcə Qurani-Kərimdən ayələr oxunub. Dövlət başçısı mərhumun ailə üzvlərinə dərin hüznlə başsağlığı verib.
AZƏRTAC xəbər verir ki, Zəlimxan Yaqubun ailə üzvləri mərhumun xatirəsinə göstərilən ehtirama görə prezident İlham Əliyevə minnətdarlıqlarını bildiriblər.
Sonra xalq şairi Zəlimxan Yaqubun cənazəsi son mənzilə yola salınıb.
Vida mərasimində dövlət və hökumət rəsmiləri, Milli Məclisin deputatları, ictimaiyyət nümayəndələri, mədəniyyət xadimləri iştirak ediblər.
Ömrünün 66-cı ilində dünyasını dəyişən Zəlimxan Yaqub özündən sonra zəngin bədii irs qoyub. Şifahi xalq ədəbiyyatını dərindən bilən şair yaradıcılığında bu qaynaqdan məharətlə istifadə edərək, ümumbəşəri və milli dəyərləri özündə əks etdirən qiymətli əsərlər yaradıb. O, bir çox mükafatlara, o cümlədən Azərbaycan Respublikasının yüksək dövlət mükafatlarından olan “Şöhrət” və “Şərəf” ordenlərinə layiq görülüb.
Zəlimxan Yaqub birinci Fəxri Xiyabanda dəfn olunub.
