Ailə, Qadın və Uşaq Problemləri üzrə Dövlət Komitəsinin sədri Hicran Hüseynova dünya liderlərinin gender bərabərliyinin təmin olunması və bütün qadınların hüquq və imkanlarının genişlənməsi məsələlərinə dair toplantısında iştirak edib. Sammit Çin Xalq Respublikasının sədri Si Cinpinin və Birləşmiş Millətlər Təşkilatının baş katibi Pan Gi Munun təşəbbüsü, BMT-nin himayəsi ilə keçirilib. Tədbirdə dövlət başçıları və müvafiq nazirlər iştirak ediblər. Zirvə görüşündə Hicran Hüseynovanın “Pekin Bəyannaməsinin və Fəaliyyət Platforması”nın tam icrası ilə bağlı Azərbaycan tərəfinin konsensusunu nümayiş etdirən bəyanatı yayılıb.

Hicran Hüseynova BMT-nin Əhali Fondunun icraçı direktoru Babatunde Osotimehin ilə də görüşüb. B.Osotimehin Azərbaycanın uğurlu sosial-iqtisadi inkişafında ölkə rəhbərliyinin rolunu yüksək qiymətləndirib. O, qadınların hüquqlarının önə çəkilməsi, onların səhiyyədən və sosial xidmətlərdən istifadə imkanlarının yaxşılaşdırılması, gender zorakılığının aradan qaldırılması məsələlərinin qlobal səviyyədə və beynəlxalq forumlarda Azərbaycan rəhbərliyi tərəfindən dəstəklənməsinin əhəmiyyətini qeyd edib.

Azərbaycanın qadın hüquqlarına dair Qlobal gündəliyə sadiq olduğunu vurğulayan Dövlət Komitəsinin sədri gender bərabərliyi sahəsində yeni təşəbbüslərdən, əməkdaşlıq perspektivlərindən söz açıb. H.Hüseynova B.Osotimehini bu ilin noyabrında Bakıda keçiriləcək qadın məsələlərinə dair beynəlxalq konfransa dəvət edib.

Yusif Babanlı
AZƏRTAC-ın xüsusi müxbiri
Vaşinqton