81-ci dairə
Oqtay Qorçu
Bakıda bir məkan var, Xətai rayonu ərazisində, Köhnə Günəşli qəsəbəsində. Kiçik bir dairədir, elə adı da “81-ci dairə” təki tanınıb camaat arasında. Çünki bura 81 saylı avtobusların son dayanacağıdı. Üç yolun ayrıcında yerləşən bu ərazidə xeyli çayxana, kafe və restoran, müxtəlif iaşə obyektləri var, bir sözlə, əhalinin və avtomobillərin gur yeridi.
Burada zaman-zaman müxtəlif qəzalar baş verib. Amma yol bərbad, çala-çuxur olsa da, ərazi elə də yiyəsiz görükmür, sözsüz ki, “yuxarılar”ın da bu yerdən, vəziyyətdən xəbəri var. Necə deyərlər, 81-ci dairə “gözəgirən” yerdədi. Bu ərazidən gəlib-keçən sərnişin avtobusları da çox vaxt qanunsuz dayanacaqlarda əyləci basmalı olur, sürücü saxlamadıqda isə sərnişinlərin qınagına tuş gəlir. Ancaq ətrafda bir nəzarət də var, dairənin yaxınlığında Dövlət Yol Polisi əməkdaşlarını tez-tez görmək olur, onlar dairəni dolanan, sağa-sola keçən avtomobilləri hərdən saxlayıb, sürücüləri yol hərəkəti qaydalarını pozduqlarına görə cərimələyirlər və hamısı da şifahi ehtimallara əsaslanır, çünki bu dairədə bir yol nişanı, asfaltda bir xətt belə yoxdur. Ona görə vaxtaşırı sürücülərlə polislər arasında mübahisələr düşür. Əncam çəkən isə tapılmır.
81-ci dairə adlanan bu əraziyə baş çəkən, bu mücərrəd vəziyyəti həll edən olsaydı, mən vətəndaşın da canı dincələrdi. Öncə hansı dayanacaqda düşəcəyimi, qaydaları pozmadan yolu necə, haradan adlayacağımı bilərdim və rahatca dostlarımla görüşəcəyim məkana yollanıb çayçının ərazisinə daxil olardım. Mən ki çox şey istəmirəm…
