Yapon mütəxəssisləri litium-ion akkumulyatorunun (müasir elektrotexnikada istifadə olunan elektrik akkumulyatorunun bir növü) şəffaf versiyasını hazırlayıblar.

Novator.az xəbər verir ki, yeni akkumulyatorun şəffaflığı onu ekran əvəzinə istifadə etməyə imkan verir. Həm də bu akkumulyator özü günəşdən enerji yığa bilir.

Özəl şəffaf batareyanı yaponiyalı mühəndislər professor Mitsunobu Satonun rəhbərliyi ilə 2013-cü ildə hazırlayıblar, indi isə onlar bu işi daha da təkmilləşdiriblər.

Belə şəffaf batareyalardan smartfon ekranı hazırlamaq mümkündür. İxtiraçılar mənfi elektrodun kimyəvi tərkibini dəyişməklə akkumlyatorun adi işığın təsirindən enerji yığmasına da nail olublar.

Yaponiyalı mütəxəssislər ixtiralarının təkcə mobil telefonlara tətbiq olunmayacağına ümid edirlər. Onlar hesab edirlər ki, belə şüşə günəş batareyalarından ev pəncərəsi və avtomobil şüşəsi də düzəltmək olar.