“Wikipedia” onlayn ensiklopediyasının ingilisdilli administrasiyası 381 redaktorun hesabını bağlayıb. Administrasiya hesab edir ki, həmin redaktorlar maddi maraqla məqalələrdə dəyişiklik ediblər.

Novator.az xəbər verir ki, 2015-ci ilin iyulundan başlanan araşdırmalar nəticəsində üzərində düzəliş aparılmış 210 məqalə “Wikipedia”dan çıxarılıb. Araşdırmaya ilk fürsətcil redaktorun adı qoyulub: “Orangemoody”.

Araşdırmanı könüllü redaktorlar komandası aparıb. Komanda müəyyən edib ki, düzəlişlərin əsas sifarişçiləri sahibkarlar, şirkətlər və şou-biznesin tanınmış adamları olub. Düzəlişlərdəki oxşarlıqlar göstərib ki, bu prosesi bir qrup şəxs idarə edib.

Onlayn ensiklopediya 2015-ci ilin aprelindən avqusta qədər dərc olunan materialların əksəriyyətini analiz edib. Bildirilir ki, ödənişli redaktələrin heç də hamısında qaydalar pozulmayıb.

“Wikimedia Foundation”də istifadəçi müqaviləsinin şərtlərini qəbul edən istənilən şəxs “Wikipedia”nın redaktoru ola bilər. Redaktor məqaləyə səlahiyyətli və yoxlanılmış mənbədən məlumat əlavə etməklə etibar qazanır.