İqtisadçı Rövşən Ağayev xarici ticarətin rəsmi statistikasına əsaslanıb yazır ki, 2020-ci ildə Azərbaycanda idxal malları, xüsusən qida məhsulları xeyli bahalanıb. Novator.az-ın məlumatına görə, ekspert ötən ilin yanvar-oktyabr aylarında 40 adda qida məhsulu səbətinin qiymətində 4,5 faiz yüksəliş qeydə alındığını vurğulayır: “Dövlət Statistika Komitəsinin yaydığı rəqəmlərdən də bunu müşahidə etmək mümkündür. 2020-ci ildə cari qiymətlərlə hesablandıqda idxal 22 faiz azaldığı halda, 2019-cu ilin qiymətləri ilə 36 faiz azalıb. Aydındır ki, bir il əvvəlin idxalı ucuz olduğu üçün 2020-ci ilin idxalının dəyəri müqayisəli qiymətlərlə düşür.
Bu məsələdə diqqəti çəkən iki vacib məqam var. Əvvəla, rəsmi statistika 2020-ci il üçün Azərbaycanda 2,8 faizlik inflyasiya göstərir. İstehlak bazarı idxaldan yüksək asılı ölkədə idxalın belə bahalanmasının inflyasiyaya təsirsiz ötüşməsi xeyli maraqlı görünür. Təsirsiz o mənada ki, 2019 və 2020-də təxminən eyni inflyasiya göstərilir. 2019-cu ildə 2,6 faizlik inflyasiya rəsmiləşmişdi.
Başqa bir məsələ. Azərbaycanın idxalının 60 faizini təmin edən Rusiya və Türkiyə milli valyutalarının manat qarşısında kəskin dəyər itirməsi 2020-ci ildə bu ölkələrin idxalını daha ucuz etməli idi.
Araşdırılası, yaxşı-yaxşı analiz ediləsi mövzudur. Bu məsələ inflyasiyanın alternativ hesablanmasının əhəmiyyətini bir daha göstərir”.
