Amerikalılar sülhə inanırmı?
İctimai rəy üzrə ixtisaslaşan “Gellap” (“Gallup”) şirkəti ABŞ-da Ukrayna mövzulu sorğu keçirib. 1-15 avqustda aparılmış sorğuya qatılanların 67 faizi Rusiya-Ukrayna müharibəsinin sülh razılaşması ilə bitməsinə inamsız olduğunu bəyan edib. Novator.az bildirir ki, respondentlərin 73 faizi mümkün sülh razılaşmasının Rusiyaya çox sərfəli olması ehtimalından ehtiyatlandığını deyib.
Sorğu iştirakçılarının 23 faizi müharibədən Rusiyanın, 10 faizi Ukraynanın qalib çıxacağını qeyd edib, 66 faizi heç bir tərəfin udmayacağını vurğulayıb.
Respondentlərin 46 faizinin fikrincə, ABŞ Ukraynaya gərəkli qədər dəstək vermir.
2014-cü ilin fevralında Ukraynada Qərbə bağlı qüvvələr inqilab dalğasında hakimiyyətə gəlib. Rusiya dərhal ölkənin Krım yarımadasını zəbt edərək martın 18-də özünə birləşdirib, ardınca Donetsk və Luqansk vilayətlərinin bir hissəsini də tutaraq işğalçı rejimlər qurub. 2022-ci il fevralın 24-də Rusiya total hərbi əməliyyatlara başlayıb, oktyabrın 5-də Donetsk və Luqansk bölgələrini, eləcə də Zaporojye və Xerson vilayətlərini özünə birləşdirdiyini açıqlayıb.
İşğalçı savaş başqa bölgələri də əhatə edib, ölkənin hər yanına dağıdıcı hücumlarla müşayiət olunur.
Qərb ölkələri, o cümlədən ABŞ müharibədə Ukraynaya dəstək verir.
2017-2021-ci illərdə ABŞ-a prezidentlik eləmiş Donald Tramp 2025-ci il yanvarın 20-dən yenidən dövlət başçısıdır. Seçkidən öncə onun əsas vədlərindən biri Ukrayna müharibəsinin dayandırılması olub. Donald Tramp 2025-ci ildə rusiyalı həmkarı Vladimir Putinlə çox telefon danışığı aparsa da, onu atəşkəsə razı sala bilməyib.
Avqustun 15-də ABŞ və Rusiya prezidentləri Alyaska ştatının Ankoric şəhərində bir araya gəliblər, ancaq yenə də savaşı dayandırmaq mümkün olmayıb.
Hazırda Donald Tramp Vladimir Putinin Ukrayna prezidenti Vladimir Zelenski ilə görüşünü təşkil etməyə çalışır.
Mənbə: Gallup.com
