Gələn 1,7 faiz, gedən 2,8 faiz azalıb
Dövlət Sərhəd Xidmətinin hesabatına görə, yanvar-iyul aylarında Azərbaycana 182 ölkədən 1 milyon 477,9 min nəfər (2024-cü ilin eyni dövrü ilə müqayisədə 1,7 faiz az) gəlib, onların 26,1 faizi Rusiya, 17,1 faizi Türkiyə, 8,1 faizi Hindistan, 7,9 faizi İran, 4,2 faizi Səudiyyə Ərəbistanı, 4,1 faizi Gürcüstan, 4 faizi Qazaxıstan, 3,2 faizi Pakistan, 2,3 faizi Çin, qalanları başqa ölkələrin vətəndaşları kimi qeydiyyata düşüb.
Xarici ölkələrə gedən Azərbaycan vətəndaşlarının sayının 2024-cü ilin yanvar-iyul aylarına nəzərən 2,8 faiz azalaraq 1 milyon 188,9 min nəfər olduğu, onların 40,6 faizinin Türkiyəyə, 15,7 faizinin Rusiyaya, 11,2 faizinin Gürcüstana, 8,9 faizinin İrana, 23,6 faizinin başqa ölkələrə yollandığı bildirilir.
Dövlət Statistika Komitəsinin “Azərbaycanda turizm” məcmuəsinə əsasən, 2019-cu ildə Azərbaycana 3 milyon 170,4 min əcnəbi gəlib, 2020-ci ildə ziyarətçilərin sayı 795,7 min nəfərə, 2021-ci ildə 791,8 min nəfərə enib.
2022-ci ildə ölkəyə 1 milyon 602,3 min, 2023-cü ildə 2 milyon 85,8 min, 2024-cü ildə 2 milyon 626,7 min əcnəbinin qədəm basdığı qeyd olunur.
