ABŞ-da sorğu: Tramp müdrik qərarlar verə bilərmi?
ABŞ-ın “Pyu” Araşdırma Mərkəzi (Pew Research Center) əhalinin prezident Donald Trampın Rusiya – Ukrayna münaqişəsinə yanaşmasına münasibətini öyrənib. Novator.az-ın məlumatına görə, avqustun 4-dən 10-dək aparılmış sorğunun 3554 amerikalını əhatə etdiyi bəyan olunub.
Hesabata əsasən, respondentlərin 59 faizi Donald Trampın Rusiya – Ukrayna münaqişəsi üzrə müdrik qərarlar verə biləcəyinə heç inanmır və ya çox da inanmır.
Sorğuya qatılanların 33 faizi ABŞ prezidentinin Rusiyaya, 6 faizi Ukraynaya meyil etdiyini vurğulayıb, 28 faizi Donald Trampın balansı qoruduğunu qeyd edib.
2014-cü ilin fevralında Ukraynada Qərbə bağlı qüvvələr inqilab dalğasında hakimiyyətə gəlib. Rusiya dərhal ölkənin Krım yarımadasını zəbt edərək martın 18-də özünə birləşdirib, ardınca Donetsk və Luqansk vilayətlərinin bir hissəsini də tutaraq işğalçı rejimlər qurub. 2022-ci il fevralın 24-də Rusiya total hərbi əməliyyatlara başlayıb, oktyabrın 5-də Donetsk və Luqansk bölgələrini, eləcə də Zaporojye və Xerson vilayətlərini özünə birləşdirdiyini açıqlayıb.
İşğalçı savaş başqa bölgələri də əhatə edib, ölkənin hər yanına havadan hücumlarla müşayiət olunur.
2017-2021-ci illərdə ABŞ-a prezidentlik eləmiş Donald Tramp 2025-ci il yanvarın 20-dən yenidən dövlət başçısıdır. Seçkidən öncə onun əsas vədlərindən biri Ukrayna müharibəsinin dayandırılması olub. Donald Tramp 2025-ci ildə rusiyalı həmkarı Vladimir Putinlə çox telefon danışığı aparsa da, onu atəşkəsə razı sala bilməyib.
Avqustun 15-də ABŞ və Rusiya prezidentləri Alyaska ştatının Ankoric şəhərində bir araya gələcəklər. Onların Ukrayna böhranından çıxış variantlarını müzakirə etməsi gözlənir.
Mənbə: Pewresearch.org
