Hansı xəstəliklər çox öldürür?
2024-cü ildə Azərbaycanda vəfat edənlərin 33289 nəfəri qan dövranı sistemində xəstəliyin qurbanı olub. Hesabatı yayan Dövlət Statistika Komitəsi yenitörəmələrdən ölənlərin sayını 9681 nəfər göstərir.
Rəsmi məlumata görə, 2286 nəfər sinir sistemində xəstəlik, 1964 nəfər həzm sistemində xəstəlik, 1450 nəfər tənəffüs sistemində xəstəlik, 1154 nəfər endokrin sistemdə xəstəlik, qidalanma və maddələr mübadiləsi pozuntuları, 1134 nəfər sidik-cinsiyyət sistemində xəstəlik üzündən dünyasını dəyişib.
Travma, zəhərlənmə və xarici səbəblərin təsirinin başqa nəticələri 2714, perinatal dövrdə (hamiləliyin 22-ci həftəsindən doğumdan sonrakı 7 günə qədər olan müddət) meydana çıxan bəzi hallar 735, bəzi infeksion və parazitar xəstəliklər 504, anadangəlmə anomaliyalar (inkişaf qüsurları), deformasiyalar və xromosom pozuntuları 140, qan, qanyaradıcı orqanların xəstəlikləri və immun mexanizmin prosesə cəlb olunması ilə gedən ayrı-ayrı pozuntular 84, dəri və dərialtı toxumanın xəstəlikləri 15, sümük-əzələ sisteminin və birləşdirici toxumanın xəstəlikləri 10, başqa simptomlar, əlamətlər və normadan kənara çıxmalar 3720 nəfərin həyatına son qoyub, 29 nəfər hamiləlik, doğuş və zahılıq dövründə ölüb.
