Xarici ticarətin dörd ayı
Azərbaycan 2025-ci ilin yanvar-aprel aylarında 157 ölkə ilə ticarət əməliyyatı aparıb, ixrac dəyəri 8,7 milyard dolları, idxal dəyəri 8,1 milyard dolları ötüb. Dövlət Gömrük Komitəsi aylar üzrə dinamikanı belə göstərir: yanvar – 3 milyard 38,4 milyon dollarlıq ixrac, 2 milyard 52,1 milyon dollarlıq idxal; fevral – 1 milyard 728 milyon dollarlıq ixrac, 2 milyard 85,5 milyon dollarlıq idxal; mart – 1 milyard 619,4 milyon dollarlıq ixrac, 1 milyard 525,2 milyon dollarlıq idxal; aprel – 2 milyard 398,8 milyon dollarlıq ixrac, 2 milyard 469,9 milyon dollarlıq idxal.
Hesabata görə, ixracın 5,5 faizindən çoxu MDB ölkələrinə, 71 faizə yaxını Avropa İttifaqı ölkələrinə, 23,5 faizindən çoxu başqa ölkələrə yönəlib, idxalda MDB-nin payı 27 faizdən, Avropa İttifaqının payı 11,7 faizdən, başqa ölkələrin payı 61,2 faizdən çox olub, ticarət dövriyyəsində və ixracda əsas tərəfdaş qismində İtaliya, idxalda əsas tərəfdaş kimi Rusiya qərar tutub.
İxracın əsas üç məhsulu siyahısında neft-qaz (7,7 milyard dollar), meyvə-tərəvəz (207 milyon dollar), kimya sənayesi məhsulları (117 milyon dollar) yer alır.
İdxalın ilk üçlüyündə maşın, mexanizm, elektrik aparatları, avadanlıqlar və onların hissələri (1,1 milyard dollar), yeyinti məhsulları (866,1 milyon dollar), nəqliyyat vasitələri və onların hissələri (756,4 milyon dollar) dayanır.
Yaxın qonşularla ticarət belə rəsmiləşib: Türkiyə – 1,1 milyard dollarlıq ixrac, 811,3 milyon dollarlıq idxal; Rusiya – 322,8 milyon dollarlıq ixrac, 1,5 milyard dollarlıq idxal; Gürcüstan – 234,9 milyon dollarlıq ixrac, 37,9 milyon dollarlıq idxal; İran – 5,8 milyon dollarlıq ixrac, 198,6 milyon dollarlıq idxal.
