Bazel finalçıları
İsveçrənin Bazel şəhərinin ev sahibliyi etdiyi “Avroviziya 2025” beynəlxalq mahnı müsabiqəsinin bütün finalçıları bəlli olub. Mayın 15-də keçirilmiş ikinci yarımfinalı Litva, İsrail, Ermənistan, Danimarka, Avstriya, Lüksemburq, Finlandiya, Latviya, Malta və Yunanıstan təmsilçiləri adlayıb.
Almaniya, Böyük Britaniya, Fransa, İspaniya, İsveçrə, İtaliya finala birbaşa vəsiqə almış, İslandiya, Polşa, Estoniya, Ukrayna, İsveç, Portuqaliya, Norveç, San Marino, Albaniya və Niderland birinci yarımfinalı (13 may) dəf etmişdilər.
Final mayın 17-nə təyin olunub.
İctimai teleradioları cəmləyən Avropa Yayım Birliyinin 1956-cı ildən keçirdiyi “Avroviziya” müsabiqəsində İrlandiya və İsveç 7, Niderland, Fransa, Lüksemburq və Böyük Britaniya 5, İsrail 4, İsveçrə, Danimarka, İtaliya, Norveç və Ukrayna 3, Avstriya, İspaniya və Almaniya 2, Monako, Belçika, Yuqoslaviya, Estoniya, Latviya, Türkiyə, Yunanıstan, Finlandiya, Serbiya, Rusiya, Azərbaycan və Portuqaliya 1 dəfə qalib gəlib.
