Makroiqtisadi göstəricilər
Dövlət Statistika Komitəsi makroiqtisadi hesabat yayıb. Rəsmi açıqlamaya görə, yanvar-aprel aylarında Azərbaycanda kənd təsərrüfatı istehsalı 2024-cü ilin eyni dövrü ilə müqayisədə 1,8 faiz artıb (heyvandarlıq məhsulları 1,1 faiz, bitkiçilik məhsulları 9,3 faiz).
Nəqliyyat sektorunda yük daşınması üzrə artım 3 faiz, sərnişin daşınması üzrə 5,7 faiz göstərilir.
İnformasiya və rabitə xidmətlərinin həcminin 7,8 faiz, ictimai iaşə dövriyyəsinin real ifadədə 17,7 faiz, əhaliyə göstərilən ödənişli xidmətlərin dəyərinin real ifadədə 9,6 faiz artdığı bildirilir.
Qeyd olunur ki, əhalinin gəlirləri nominal ifadədə 6,9 faiz artıb, yanvar-aprel aylarında dövlət büdcəsinə 13 milyard 964,9 milyon manat gəlib, büdcədən 10 milyard 961,9 milyon manat xərclənib.
Hesabata əsasən, mayın 1-nə ölkədə 5 milyon 39,6 min nəfər məşğul şəxs, 225,8 min nəfər işsiz qeydə alınıb, aprelin 1-nə 1 milyon 100,5 min nəfər pensiyaçı rəsmiləşib.
Muzdlu işçilərin orta aylıq nominal əməkhaqqı aprelin 1-nə 1083,8 manat olub. Ən yüksək orta maaş bu iqtisadi fəaliyyət növlərində qeydə alınıb:
mədən sənayesi – 3961,2 manat;
maliyyə və sığorta fəaliyyəti – 2630 manat;
informasiya və rabitə – 1961,5 manat;
peşə fəaliyyəti, elmi və texniki fəaliyyət – 1718,6 manat;
nəqliyyat və anbar təsərrüfatı – 1604,2 manat;
dövlət idarəetməsi və müdafiə; sosial təminat – 1454,4 manat;
tikinti – 1150,2 manat;
daşınmaz əmlakla əlaqədar əməliyyatlar – 1107 manat;
elektrik enerjisi, qaz və buxar istehsalı, bölüşdürülməsi və təchizatı – 1103,3 manat.
Ölkədə minimum aylıq əməkhaqqı 400 manatdır.
