Prezident seçkisi ikinci tura qaldı
Rumıniyada mayın 4-də keçirilmiş prezident seçkisinin ilkin nəticələri açıqlanıb. Rəsmi hesabata görə, 11 nəfərin yarışdığı birinci turda müxalif Rumınların Birliyi Alyansından Corce Simion 41 faizə yaxın, müstəqil namizəd Nikuşor Dan 21 faizə yaxın səs toplayıb. Onlar mayın 18-nə təyin olunmuş ikinci turda üz-üzə gələcəklər.
Prezidentin səlahiyyət müddəti beş ildir. 2014 və 2019-cu illərdə Klaus Yohannis dövlət başçısı seçilib. 2024-cü ilin prezident seçkisi yarımçıq qalıb. Noyabrın 24-də keçirilmiş ilk turda partiyasız namizəd Kalin Corcesku və Rumıniyanın Xilası İttifaqının təmsilçisi Yelena Laskoni önə çıxıblar, ancaq dekabrın 6-da Konstitusiya Məhkəməsi nəticələri ləğv edib.
Klaus Yohannis bu il fevralın 10-da postundan ayrıldığını bəyan edib, fevralın 12-də prezident səlahiyyətləri parlamentin yuxarı palatasının – Senatın sədri İliye Bolojana keçib.
Rumıniyada hökuməti dörd ildən bir proporsional üsulla (partiya siyahıları üzrə) seçilən parlamentdə (Senat və aşağı palata – Deputatlar Palatası) çoxluq əldə edən siyasi qüvvə qurur. Hazırda hakim koalisiyaya Sosial Demokrat Partiyası, Milli Liberal Partiya, Rumıniya Macarlarının Demokratik İttifaqı daxildir.
