Futbol aləmində
Avropanın aparıcı milli futbol çempionatlarının üçündə qalib məlumdur. Fransada PSJ, İngiltərədə “Liverpul”, Almaniyada “Bavariya” qızıl medalları erkən təmin edib.
İspaniya çempionatında “Barselona” 79, “Real” 75, “Atletiko” 67, “Atletik” 61, “Vilyarreal” 58, “Betis” 57 xal götürüb.
İtaliya çempionatında “Napoli” 77, “İnter” 74, “Atalanta” 68, “Yuventus”, “Roma” və “Latsio” 63, “Bolonya” 62 xal yığıb.
UEFA-nın klub turnirlərində 2025-2026 mövsümünün ilkin sxeminə görə, turnirlərə 54 UEFA üzvünün (Rusiya yarışlardan kənardır) 239 komandası (Çempionlar Liqasına 83, Avropa Liqasına 45, Konfrans Liqasına 111) buraxılır.
Çempionlar Liqasının birinci mərhələsində ələnənlər Konfrans Liqasına, sonrakı mərhələlərində ələnənlər Avropa Liqasına, Avropa Liqasının təsnifat raundlarında ələnənlər Konfrans Liqasına köçür. Hər üç turnirin liqa mərhələsində 36 komandanın iştirakı nəzərdə tutulur, 9-24-cü yerləri tutanlar 1/16 finala, ilk 8 pilləni tutanlar 1/8 finala çıxır.
Azərbaycan təmsilçiləri Çempionlar Liqası və Avropa Liqasına birinci mərhələdən, Konfrans Liqasına ikinci mərhələdən başlayır.
Turnirlər 2025-ci ilin iyulunda start götürür. Avropa Liqasının finalı 2026-cı il mayın 20-nə (İstanbul), Konfrans Liqasının finalı mayın 27-nə (Leypsiq), Çempionlar Liqasının finalı mayın 30-na (Budapeşt) təyin olunub.
