Savaş Ukrayna əhalisini nə qədər azaldıb?
2024-cü ilin sonuna Ukraynada əhalinin sayı 32 milyon nəfərə düşüb. Baş nazirin müavini, milli birlik naziri Aleksey Çernışovun açıqlamasına görə, dövlət müstəqilliyinin bəyan olunduğu 1991-ci ildə ölkədə 52 milyon nəfər yaşayıb, Rusiyanın 2014-cü ildəki ilk təcavüzünə qədər əhalinin sayı 45 milyon nəfərə, 2015-ci ildə 42 milyon nəfərə enib, 2022-ci ildəki total təcavüzdən bəri isə daha 10 milyon nəfər azalıb.
Aleksey Çernışov qeyd edib ki, 60 milyon nəfərə yaxın ukraynalının az qala yarısı ölkədən qıraqda yaşayır.
2014-cü ildə Rusiya Ukraynanın Krım yarımadasını tutaraq özünə birləşdirib, Donetsk və Luqansk vilayətlərinin bir hissəsində işğalçı rejimlər qurub. 2022-ci il fevralın 21-də Rusiya Donetsk və Luqansk rejimlərini “müstəqil dövlətlər” kimi tanıyıb, fevralın 24-dən Ukraynada total hərbi əməliyyatlar apararaq ölkənin cənub-şərq bölgəsini ələ keçirib. Sentyabrın 29-da Rusiya Zaporojye və Xerson vilayətlərini “suveren və müstəqil” subyektlər kimi tanıyıb, oktyabrın 5-də həmin bölgələri, eləcə də Donetsk və Luqansk vilayətlərini özünə birləşdirdiyini açıqlayıb.
