Biri tamam…
UEFA Konfrans Liqasının liqa raundu başa çatıb, 36 komandanın 8-i 1/8 finala, 16-sı 1/16 finala çıxıb, 12-si turniri tərk edib.
Çempionlar Liqası və Avropa Liqasının liqa raundlarında sona iki tur qalır. 36 komandalıq raundlarda ilk 8 pilləni tutanlar 1/8 finala, 9-24-cü yerləri tutanlar 1/16 finala vəsiqə alacaq. Hələlik Çempionlar Liqasında (ÇL) 2, Avropa Liqasında (AL) 7 komanda mərhələ adlayıb.
Avropa Liqasında yarışan Azərbaycan təmsilçisi “Qarabağ” 3 xalla 33-cü pillədədir.
2024-2025 mövsümünə buraxılmış 236 komandanın 140-ı ələnib. Rusiya yarışlardan kənardır, 21 ölkə, o cümlədən Moldova, Ermənistan, Qazaxıstan, Litva, Estoniya, Gürcüstan, Belarus təmsilçilərini itirib, İngiltərə, İtaliya, İspaniya, Almaniya, Portuqaliya, Belçika tam tərkibdə qalır.
Azərbaycan 55 üzvü olan UEFA-nın klub reytinqində 28-ci pillədədir. Reytinq turnirlərin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Liqa mərhələsindən başlayaraq finala qədər bonus xalları da var. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 2,875 əmsal qazanıb.
