Neftsiz ixracda artım
İqtisadi İslahatların Təhlili və Kommunikasiya Mərkəzinin hesabatına görə, yanvar-sentyabr aylarında Azərbaycanın qeyri-neft ixracı 2023-cü ilin eyni dövrü ilə müqayisədə 1,3 faiz artaraq 2,5 milyard ABŞ dolları dəyərində rəsmiləşib.
İxrac malları siyahısında pambıq mahlıcı 150,7 milyon dollarla birinci, tomat (pomidor) 139,6 milyon dollarla ikinci, qızıl 115,3 milyon dollarla üçüncü yerdə göstərilir.
Əsas ünvanların ilk beşliyində Rusiya, Türkiyə, Gürcüstan, İsveçrə və ABŞ qərarlaşıb.
Dövlət Gömrük Komitəsi qeyri-neft/qaz sektoru üzrə ixracda ilk üçlüyü belə sıralayıb: meyvə-tərəvəz (458,7 milyon dollar), plastmas və ondan hazırlanan məmulatlar (301,1 milyon dollar), kimya sənayesi məhsulları (211,8 milyon dollar).
