Klub turnirlərində
UEFA Çempionlar Liqası (1) və Avropa Liqasının (2) liqa raundlarında üç, Konfrans Liqasının (3) liqa raundunda iki tur oynanıb. Hər birində 36 komanda olan liqa raundlarında ilk 8 pilləni tutanlar 1/8 finala, 9-24-cü yerləri tutanlar 1/16 finala çıxacaq.
Avropa Liqasında yarışan Azərbaycan təmsilçisi “Qarabağ” hər üç oyunda yenilib, 36-cı pillədə yer alır.
Reqlamentə görə, yekunda xallar bərabər olarsa, ardıcıllıqla bu meyarlar əsas götürülür: top fərqi, qol sayı, səfərdə qol sayı, qələbə sayı, rəqib meydanında qələbə sayı, rəqiblərin göstəriciləri (xal, top fərqi, top sayı), cəza balı (sarı və qırmızı vərəqələr), komandanın reytinqi.
Azərbaycan 55 üzvü olan UEFA-nın klub reytinqində 28-ci pillədədir. Reytinq turnirlərin son beş mövsümündə qazanılan əmsallara əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Liqa mərhələsindən başlayaraq finala qədər bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır. Azərbaycan bu mövsüm 2,375 əmsal qazanıb.
1955-ci ildən keçirilən, 1991-ci ilə qədər Çempionlar kuboku adlanmış Çempionlar Liqasında “Real” 15, “Milan” 7, “Bavariya” və “Liverpul” 6, “Barselona” 5, “Ayaks” 4, “İnter” (İtaliya) və “Mançester Yunayted” 3, “Benfika”, “Nottingem Forest”, “Yuventus”, “Portu” və “Çelsi” 2, “Seltik”, “Feyenoord”, “Aston Villa”, “Hamburq”, “Styaua”, PSV, “Srvena Zvezda”, “Marsel”, “Borussiya” (Dortmund) və “Mançester Siti” 1 titula sahibdir.
1971-ci ildən keçirilən, 2008-ci ilədək UEFA kuboku adlanmış Avropa Liqasında “Sevilya” 7, “Liverpul”, “Yuventus”, “İnter” (İtaliya) və “Atletiko” 3, “Tottenhem”, “Feyenoord”, “Borussiya” (Mönhenqladbah), “Ayntraxt” (Frankfurt), “Höteborq”, “Real”, “Parma”, “Portu” və “Çelsi” 2, PSV, “İpsviç”, “Anderlext”, “Bayer”, “Napoli”, “Ayaks”, “Bavariya”, “Şalke”, “Qalatasaray”, “Valensiya”, SSKA (Rusiya), “Zenit”, “Şaxtyor” (Ukrayna), “Mançester Yunayted”, “Vilyarreal” və “Atalanta” 1 uğur qazanıb.
2021-ci ildən keçirilən Konfrans Liqasında “Roma”, “Vest Hem” və “Olimpiakos”un 1 zəfəri var.
