Ukraynada demoqrafik fəlakət
2024-cü ilin ilk yarısında Ukraynada 87 min 655 uşaq doğulub. Rəsmi hesabata görə, bu, 2023-cü ilin eyni dövrü ilə müqayisədə 9 faiz azdır.
Yanvar-iyun aylarında ölənlərin sayı 250 min 972 nəfər göstərilir.
Statistikaya əsasən, hər doğumun qarşılığında 3 ölüm qeydə alınıb.
Rusiyanın total təcavüzünə qədər olan dövrlə müqayisədə doğumun 1,5 dəfə azaldığı bildirilir.
Ukrayna 2022-ci ildən demoqrafik fəlakət yaşayır. 2014-cü ildə Rusiya Ukraynanın Krım yarımadasını tutaraq özünə birləşdirib, Donetsk və Luqansk vilayətlərinin bir hissəsində işğalçı rejimlər qurub. 2022-ci il fevralın 21-də Rusiya Donetsk və Luqansk rejimlərini “müstəqil dövlətlər” kimi tanıyıb, fevralın 24-dən Ukraynada total hərbi əməliyyatlar apararaq ölkənin cənub-şərq bölgəsini ələ keçirib. Sentyabrın 29-da Rusiya Zaporojye və Xerson vilayətlərini “suveren və müstəqil” subyektlər kimi tanıyıb, oktyabrın 5-də həmin bölgələri, eləcə də Donetsk və Luqansk vilayətlərini özünə birləşdirdiyini açıqlayıb.
