Gəlirli-gəlirsiz partiyalar
Qüvvədə olan qanuna görə, siyasi partiyanın əsas maliyyələşmə mənbələri üzvlük haqqı, ianə, dövlət maliyyə yardımı, çap mediasının, ictimai-siyasi nəşrlərin, başqa təbliğat və təşviqat materiallarının hazırlanması və satışı, mülki hüquq müqavilələri üzrə əldə edilən vəsait, hüquq varisliyi və vərəsəlik yolu ilə əldə edilən əmlakdır.
Mərkəzi Seçki Komissiyasına təqdim olunan maliyyə hesabatlarına görə, Azad Vətən Partiyası, Azərbaycan Demokrat Partiyası, Azərbaycan Xalq Cəbhəsi Partiyası, Azərbaycan Ümid Partiyası, Böyük Azərbaycan Partiyası, Gələcək Azərbaycan Partiyası, Haqq-Ədalət Partiyası, Milli Dirçəliş Hərəkatı Partiyası, Müasir Müsavat Partiyası 2023-cü ildə heç bir gəlir əldə etməyib.
Dövlət maliyyə yardımını parlamentdə təmsil olunan partiyalar alır.
Yeni Azərbaycan Partiyasının 2023-cü il üzrə gəliri 32,9 milyon manat göstərilir. Qalan parlament partiyaları belə sıralanır: Vətəndaş Həmrəyliyi Partiyası – 345,1 min manat, Böyük Quruluş Partiyası – 283,4 min manat, Azərbaycan Demokratik Maarifçilik Partiyası – 283,3 min manat, Ana Vətən Partiyası, Ədalət, Hüquq, Demokratiya Partiyası, Demokratik İslahatlar Partiyası, Milli Cəbhə Partiyası, Respublikaçı Alternativ Partiyası, Vəhdət Partiyası – 283,2 min manat.
Qeyd olunur ki, 2023-cü ili Müsavat Partiyası 9990 manat, Azərbaycan Milli İstiqlal Partiyası 3044 manat, Ağ Partiya 2350 manat, Ədalət Partiyası 2023,9 manat, Azərbaycan Xalq Partiyası 1700 manat, Yeni Zaman Partiyası 727,8 manat, Klassik Xalq Cəbhəsi Partiyası 100 manat gəlirlə basa vurub.
