Arif Hacılı yeni postda
Mayın 18-də Müsavat Partiyası Məclisinin yeni tərkibdə ilk iclası keçirilib. Rəsmi məlumata görə, Məclis sədri postuna Arif Hacılı mandat alıb, həmçinin Məclisin katibi, Divan üzvləri seçilib, başqan müavinləri təsdiqlənib.
1962-ci il təvəllüdlü Arif Hacılı milli azadlıq hərəkatının (1988-1991) öncül şəxslərindəndir. 1991-1992-ci illərdə Azərbaycan Xalq Cəbhəsinin Ali Məclisinə sədrlik edib.
1990-cı ildə parlamentin deputatı seçilib, Əbülfəz Elçibəyin prezidentliyi dövründə (1992-1993) ərazi hakimiyyət və idarəetmə orqanları ilə iş üzrə dövlət müşaviri postunu tutub.
1992-ci ildən Müsavatın katibi, 2001-ci ildən partiya başqanının müavini olub.
2003-2005 və 2011-2012-ci illərdə həbsdə yatıb.
2014 və 2019-cu illərdə başqan seçilib.
Müsavat Partiyasının 2024-cü il mayın 4-5-də keçirilən 11-ci qurultayında təşkilati məsələlərə baxılıb, İsa Qəmbər başqan seçilib, Mərkəzi Nəzarət-Təftiş Komissiyası və Məclisin yeni tərkibləri formalaşıb.
Qurultaylararası dövrdə partiyanın bütün fəaliyyətinə Məclis rəhbərlik edir. Başqan hər hansı səbəbdən öz vəzifəsini icra edə bilmədikdə onun bütün səlahiyyətlərini Məclisin sədri həyata keçirir.
1911-ci ildə yaradılan Müsavat 1920-ci ildən mühacirətdə fəaliyyət göstərib, 1992-ci ildə Bakıda bərpa olunub. Partiyanın ilk başqanı Məhəmməd Əmin Rəsulzadə, ikinci başqanı Mirzə Bala Məmmədzadə, üçüncü başqanı Kərim Odər, dördüncü başqanı Məhəmməd Azər Aran, beşinci və yeddinci başqanı İsa Qəmbər, altıncı başqanı Arif Hacılıdır.
