Belçikada Azərbaycan yarışı
Belçikanın paytaxtı Brüsseldə 28 May – Müstəqillik Gününə həsr olunmuş şahmat turniri keçirilib. Yeni təsis olunmuş “FireLand” Azərbaycanlılar Birliyinin aprelin 28-də təşkil etdiyi turnirə Azərbaycan Respublikasının Belçikadakı səfirliyi dəstək verib.
“FireLand” Azərbaycanlılar Birliyinin sədri İlahə Tağıyeva turnirin açılış mərasimində qurumun şahmat məktəbi barədə məlumat verərək deyib ki, dərsləri Belçikada təhsil alan azərbaycanlı Elmir Qırxıyev aparır.
Mərasimdə danışan Azərbaycan Respublikasının Belçikadakı səfiri Vaqif Sadıqov bu kimi tədbirlərin azərbaycanlıların bir araya toplanması, onların təmaslarının daha da güclənməsi baxımından faydalı olduğunu vurğulayıb.
Belçika, Fransa və Niderland təmsilçilərini bir araya gətirən yarış üç fərqli səviyyə üzrə qruplarda aparılıb, bütün iştirakçılara sertifikat və medallar, qaliblərə isə hədiyyələr təqdim olunub.
