Dövlət nəyə boyun olub?
Avropa İnsan Hüquqları Məhkəməsi aprelin 4-də siyasətçi Məmməd İbrahimin şikayəti üzrə qərardad elan edib. Aihmaz.org xəbər verir ki, Məmməd İbrahimin Avropa İnsan Hüquqları Konvensiyası ilə qorunan ədalətli məhkəmə araşdırması hüququnun pozuntusunu etiraf edən Azərbaycan dövləti ona 4100 avro təzminat ödəməyə və işinə Ali Məhkəmədə yenidən baxmağa boyun olub.
AXCP funksioneri olan Məmməd İbrahim 2015-ci ildə xuliqanlıq ittihamı ilə həbs edilərək 3 il həbs cəzası alıb. 2018-ci ildə ona cəzaçəkmə müəssisəsində qadağan olunmuş əşya saxlamaq ittihamı ilə yeni cinayət işi açılıb. 5 ay 22 gün azadlıqdan məhrumetmə cəzası verilən cəbhəçi 2019-cu il fevralın 13-də azadlığa buraxılıb.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
