Son döyüşlərin şəhidləri
Müdafiə və Daxili İşlər nazirlikləri Qarabağda sentyabrın 19-20-də keçirilmiş hərbi əməliyyatda şəhid olan hərbi qulluqçuların siyahısını yayıb.
Novator.az bildirir ki, siyahılarda 192 nəfərin adı göstərilir. Onların 180-i Müdafiə Nazirliyinin, 12-si Daxili İşlər Nazirliyinin hərbi qulluqçusudur. 38-i zabit (2 polkovnik-leytenant, 4 mayor, 6 kapitan, 12 baş leytenant, 8 leytenant, 6 kiçik leytenant), 23-ü gizir, 23-ü çavuş, 105-i əsgər, 3-ü matrosdur.
Daxili İşlər Nazirliyinin siyahısında şəhidlərin təvəllüdü qeyd olunmayıb.
Müdafiə Nazirliyinin siyahısındakı şəhidlərin 2-si 1982-ci il təvəllüdlü, 3-ü 1983-cü il təvəllüdlü, 1-i 1984-cü il təvəllüdlü, 2-si 1985-ci il təvəllüdlü, 5-i 1986-cı il təvəllüdlü, 4-ü 1987-ci il təvəllüdlü, 3-ü 1988-ci il təvəllüdlü, 7-si 1989-cu il təvəllüdlü, 3-ü 1990-cı il təvəllüdlü, 5-i 1991-ci il təvəllüdlü, 5-i 1992-ci il təvəllüdlü, 4-ü 1993-cü il təvəllüdlü, 8-i 1994-cü il təvəllüdlü, 9-u 1995-ci il təvəllüdlü, 9-u 1996-cı il təvəllüdlü, 10-u 1997-ci il təvəllüdlü, 9-u 1998-ci il təvəllüdlü, 7-si 1999-cu il təvəllüdlü, 9-u 2000-ci il təvəllüdlü, 3-ü 2001-ci il təvəllüdlü, 10-u 2002-ci il təvəllüdlü, 12-si 2003-cü il təvəllüdlü, 39-u 2004-cü il təvəllüdlü, 11-i 2005-ci il təvəllüdlüdür.
Səhiyyə Nazirliyinin məlumatına görə, 11 şəhidin şəxsiyyəti genetik müayinələrdən sonra müəyyənləşəcək.
Hərbi əməliyyat zamanı 1 mülki şəxs də şəhid olub.
Yaralıların sayı 512 nəfər göstərilir. Onlardan 511-i hərbi qulluqçu, 1-i mülki şəxsdir.
Sentyabrın 19-da Azərbaycan Silahlı Qüvvələri Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsinə nəzarət edən işğalçı erməni rejiminə qarşı hərbi əməliyyata başlayıb, ertəsi gün düşmən silahı yerə qoymaq, tərksilah olmaq öhdəliyi götürüb.
