Qənirə Paşayeva süni tənəffüs aparatına qoşulub
Milli Məclisin mədəniyyət komitəsinin sədri Qənirə Paşayeva Bakıdakı Mərkəzi Klinikada müalicə alır. Report.az-ın 25 sentyabr məlumatına görə, deputat süni tənəffüs aparatına qoşulub.
Qənirə Paşayeva sentyabrın 23-nə keçən gecə naməlum mənşəli hipotonik vəziyyət diaqnozu ilə xəstəxanaya yerləşdirilib.
Mərkəzi Klinikanın mətbuat xidmətindən AZƏRTAC-a verilən məlumata görə, Heydər Əliyev Fondu Qənirə Paşayevanın müalicəsini nəzarətə götürüb, Türkiyədən reanimatoloq həkim dəvət olunub: “Hazırda müalicə reanimasiya və intensiv terapiya şöbəsində davam etdirilir və lazımi kompleks reanimasiyon tədbirlər həyata keçirilir. Müalicə zamanı tibbin bütün imkanlarından istifadə olunur, Türkiyənin ən aparıcı xəstəxanalarından olan həmkarlarımızla daimi əlaqə saxlanır və konsultasiyalar aparılır”.
1975-ci il martın 24-də Tovuz rayonunun Düz Qırıqlı kəndində doğulan Qənirə Paşayeva Azərbaycan Dövlət Tibb Universitetinin pediatriya fakültəsini və Bakı Dövlət Universitetinin beynəlxalq hüquq fakültəsini bitirib. Siyasi elmlər üzrə fəlsəfə doktoru, professordur.
1998-ci ildən ANS televiziyasında müxtəlif vəzifələrdə çalışıb. 2005-2012-ci illərdə Heydər Əliyev Fondunun ictimaiyyətlə əlaqələr şöbəsinin müdiri olub, 2012-2015-ci illərdə Odlar Yurdu Universitetinin siyasi elmlər kafedrasına rəhbərlik edib.
2005, 2010, 2015 və 2020-ci illərdə 105 saylı Tovuz dairəsindən Milli Məclisin deputatı seçilib.
