Şuşada xiyaban: təşəbbüs var
Bir qrup şuşalı müharibə veteranı may ayında prezident İlham Əliyevə müraciət edərək şəhərdəki şəhidlər məzarlığının abadlaşdırılması məsələsini qaldırmışdı: “Şuşanın müdafiəsi uğrunda canını fəda etmiş şəhidlərimizin uyuduğu, Cıdır düzü ərazisində yerləşən məzarlığın abadlaşdırılması və orada xiyaban salınmasını, xiyabanın girişində Şuşanın müdafiəsi və işğaldan azad olunması uğrunda şəhid olmuş qəhrəman vətən övladlarının xatirə guşəsinin yaradılmasını arzu edirik və yerli sakinlərin bu arzularını gerçəkləşdirmələri üçün yardımçı olmalarına icazə verilməsini xahiş edirik”.
Müraciətin müəlliflərindən olan hüquqçu Yavər Hüseyn Novator.az-a deyib ki, Şuşada şəhidlər xiyabanının salınmasına köməklik məqsədilə şəhidlərin barelyeflərini hazırladıblar: “Hamısı eyni ölçüdə və formada olan barelyeflərin şəhidlərin məzarı üzərinə bərkidilməsini istəmişik. Şuşada vətən uğrunda canını fəda etmiş şəhidlərin xatirəsinə layiq xiyaban yaradılacağına inanırıq”.
Bir çox döyüşçünün və erməni terrorunun qurbanı olan şəxsin dəfn edildiyi Şuşa şəhidlər məzarlığı işğal dövründə dağıdılıb.
