Kəlbəcər və Laçın səfəri
Prezident İlham Əliyev avqustun 25-də birinci vitse-prezident Mehriban Əliyeva ilə birgə Kəlbəcərə səfər edib. AZƏRTAC xəbər verir ki, dövlət başçısı “Soyuqbulaq”, “Çıraq-1” və “Çıraq-2” Kiçik Su Elektrik stansiyalarının açılışlarına qatılıb, “İstisu” Mineral Sudoldurma Zavodunun tikintisi ilə tanış olub.
Prezidentə “İstisu” Müalicə-İstirahət Kompleksində görülən işlər barədə məlumat verilib, o həmçinin Zar kəndinin təməl mərasimində iştirak edib.
Həmin gün İlham Əliyev və Mehriban Əliyeva Laçın rayonuna da baş çəkiblər. “Mişni” və “Alxaslı” Kiçik Su Elektrik stansiyalarının açılışlarında iştirak edən dövlət başçısı Laçın Beynəlxalq Hava Limanında tikinti işlərinin gedişi ilə maraqlanıb, Kəlbəcər-Laçın avtomobil yolunda aparılan işlərlə tanış olub.
Prezident Laçın şəhərinə yaxın ərazidə inşa ediləcək mehmanxana kompleksinin təməl mərasiminə, Laçın rayonunun sənaye zonasında mebel fabrikinin açılışına qatılıb, prefabrik modul evlərin istehsalı müəssisəsinin və xırdabuynuzlu heyvanların saxlanması məntəqəsinin fəaliyyəti ilə tanış olub, “Hoçazfilm” yaradıcılıq studiyasının çəkiliş pavilyonunun, Laçın rayon 2 nömrəli tam orta məktəbin və “Həkəri Balıq Təsərrüfatı”nın açılışlarında iştirak edib.
