Jurnalistlərin üçüncü binası: nöqtə qoyuldu
Bakıda jurnalistlər üçün tikilmiş üçüncü binanın taleyinə aydınlıq gəlib. Avqustun 25-də Əmək və Əhalinin Sosial Müdafiəsi Nazirliyinin sözçüsü Fazil Talıbov açıqlama yayaraq bəyan edib ki, Bibiheybət qəsəbəsi, Yeni Salyan yolu, 20 ünvanında yerləşən 255 mənzilli binadakı mənzillər şəhid ailələrinə və ölkənin ərazi bütövlüyü uğrunda döyüşlərdə yaralanaraq əlilliyi müəyyən olunmuş şəxslərə təqdim olunacaq. Sərəncamı Nazirlər Kabineti verib.
Bibiheybət qəsəbəsində, Yeni Salyan yolunda jurnalistlərin yaşadığı iki bina var. 156 mənzilli ilk bina 2013-cü ildə, 255 mənzilli ikinci bina 2017-ci ildə media işçilərinə təqdim olunub, mənzillər jurnalistlərə pulsuz verilib. Hər iki yaşayış binası prezident sərəncamları ilə dövlət vəsaiti hesabına inşa edilib.
Bünövrəsi 2017-ci ildə qoyulmuş 255 mənzilli üçüncü bina da eyni şərtlər əsasında tikilib.
2021-ci il iyulun 24-də bir qrup media və QHT nümayəndəsi prezident İlham Əliyevə müraciətdə binadakı mənzillərin şəhid ailələrinə, 2020-ci ilin Vətən müharibəsindəki qələbədə xidmətləri olan hərbi qulluqçulara və qazilərə verilməsini istəyib. Həmin müraciətin ardınca binanın Əmək və Əhalinin Sosial Müdafiəsi Nazirliyinin ixtiyarına keçdiyi xəbəri yayılmış, ancaq bu iddia təkzib olunmuşdu.
Jurnalistlərin binası nazirliyə verilir?
“Jurnalistlər üçün tikilmiş bina jurnalistlərə verilməlidir”
