Tahir Kazımlı – 65
Tanınmış ədib, mətnşünas, publisist Tahir Kazımlının 65 yaşı tamam olur.
Tahir Kazımlı 1958-ci il avqustun 16-sı Ordubadın Aşağı Aza kəndində (Azadkənd) doğulub. 1985-ci ildə indiki Bakı Dövlət Universitetinin filologiya fakültəsini bitirib. Uzun illər neft sənayesi üzrə həmkarlar qurumunda rəhbər vəzifə tutub.
“Proloq” ədəbiyyat qəzetinin qurucusu və baş redaktoru olan Tahir Kazımlı “Aydın yol” həftəliyində, “Multikulturalizm” jurnalında da çalışıb.
Hazırda Bakı Beynəlxalq Multikulturalizm Mərkəzinin məsul əməkdaşıdır.
Özünün “Facebook” səhifəsində Tahir Kazımlını təbrik edən jurnalist Sevinc Fədai yazır: “Tahir müəllimlə tez-tez rastlaşırıq. Hər görəndə bağrına basır məni. Hər gün görsə, yenə eyni həssaslıqla, eyni doğmalıqla, eyni nəzakətlə hal-əhval tutur.
Bir dəfə beləcə görüşüb ayrılanda soruşdular ki, atanızdır?
Mən ədəbiyyat adamlarını, yaradıcı insanları həmişə məhz belə təsəvvür etmişəm. Belə böyük, amma həm də uşaq kimi istiqanlı, təmiz”.
