Yeddi aylıq xarici ticarət
Yeddi aylıq xarici ticarət statistikası yayılıb. Novator.az bildirir ki, Dövlət Gömrük Komitəsinin hesabatına görə, Azərbaycan 2023-cü ilin yanvar-iyul aylarında 190 ölkə ilə ticarət aparıb, ixrac 20,7 milyard dolları, idxal 9,5 milyard dolları ötüb, gömrükdən dövlət büdcəsinə 3,6 milyard manatdan çox vəsait ödənib.
Yanvar və iyunda 1,8 milyard, fevralda 2,6 milyard, martda 3,2 milyard, apreldə 4,8 milyard, mayda 3,5 milyard, iyulda 2,8 milyard dollarlıq ixrac qeydə alınıb.
İdxal göstəriciləri belədir: yanvar – 1,4 milyard dollar, fevral və aprel – 1,2 milyard dollar, mart, iyun və iyul – 1,3 milyard dollar, may – 1,5 milyard dollar.
İxracın 90,3 faizinin neft-qaz sektoruna aid olduğu, idxalda ən böyük payın (18,8 faiz) maşın, mexanizm, elektrik aparatları, avadanlıqlar və onların hissələrini əhatə etdiyi vurğulanır.
Məlumata əsasən, ixracın 4,6 faizi MDB ölkələrinə, 65,9 faizi Avropa İttifaqı ölkələrinə, 29,5 faizi başqa ölkələrə yönəlib, idxalda MDB-nin payı 29,3 faiz, Avropa İttifaqının payı 18,6 faiz, başqa ölkələrin payı 52,1 faiz olub.
Yeddi ayın əsas xarici ticarət tərəfdaşları belə sıralanır: İtaliya, Türkiyə, Rusiya, Çin, Almaniya, Yunanıstan, İsrail, Hindistan, İspaniya, Çexiya, Türkmənistan, Gürcüstan, Rumıniya, Fransa, İrlandiya.
İxracda ən böyük tərəfdaş olan Avropa İttifaqına 13,7 milyard dollarlıq məhsul göndərilib. Bunun 9,3 milyard dolları İtaliyanın payına düşüb. Yunanıstan 946,2 milyon dollarla ikinci, İspaniya 654,7 milyon dollarla üçüncüdür.
