Pensiyaçıların sayı, orta pensiya
Dövlət Sosial Müdafiə Fondu 2023-cü il iyulun 1-nə pensiyaçıların sayını 1 milyon 96,6 min nəfər, aylıq pensiyaların orta məbləğini 435 manat göstərib.
Minimum pensiya 280 manatdır.
Novator.az bildirir ki, yarım ildə pensiyaçıların sayı 17,6 min nəfər azalıb. Yanvarın 1-nə 1 milyon 114,2 min nəfər pensiyaçı qeydə alınmışdı.
Azərbaycanda kişilər 65, qadınlar 63 yaş yarımda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (2023-cü il üçün 40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat müavinət verilir.
Azərbaycanda pensiyalar orta aylıq nominal əməkhaqqının illik artım tempinə uyğun indeksləşdirilir. Dövlət Statistika Komitəsinin hesabatına görə, yanvar-iyun aylarında orta maaş 2022-ci ilin eyni dövrü ilə müqayisədə 11,5 faiz artıb.
