Gürcüstanın turizm gəlirləri 57,9 faiz artıb
2023-cü ilin ilk yarısında Gürcüstanın xarici ziyarətçilərdən əldə etdiyi gəlir 1,8 milyard dolları ötüb. Novator.az-ın məlumatına görə, hesabatı ölkənin Milli Bankı yayıb.
Statistikaya əsasən, yarım ildə turizm gəlirləri 2022-ci ilin yanvar-iyun ayları üzrə analoji göstəricini 57,9 faiz üstələyib. Rusiyalıların ilin ilk yarısında Gürcüstanda 482,1 milyon dollar, türkiyəlilərin 264 milyon dollar, Avropa İttifaqından ziyarətçilərin 215,7 milyon dollar, israillilərin 148,2 milyon dollar, ukraynalıların 101,8 milyon dollar xərclədiyi bildirilir.
Milli Turizm Administrasiyası yarım ildə Gürcüstana 2,8 milyon əcnəbinin gəldiyini, ziyarətçilərin 1,9 milyon nəfərinin turistlər olduğunu açıqlayıb, statistikanın ilk beşliyində Türkiyə, Rusiya, Ermənistan, İsrail və Azərbaycan təmsilçilərini göstərib.
Mənbələr: Nbg.gov.ge, Georgia.travel
