Surət Davud oğlu Hüseynov
Sabiq baş nazir Surət Hüseynov iyulun 31-də vəfat edib.
Novator.az bildirir ki, Surət Davud oğlu Hüseynov 1959-cu il sentyabrın 13-ü Kirovabad (Gəncə) şəhərində doğulub. Azərbaycan Texnologiya İnstitutunu (Universitetini) bitirib, müxtəlif yüngül sənaye müəssisələrində məsul vəzifələr tutub.
1990-cı ildə parlamentin deputatı seçilib.
Birinci Qarabağ müharibəsinin ilk dövründə cəbhə bölgəsinə davamlı yardımları ilə ad çıxarıb.
1992-ci il iyulun 2-də prezident Əbülfəz Elçibəy Surət Hüseynovu baş nazirin müavini, Qarabağ bölgəsi üzrə fövqəladə səlahiyyətli nümayəndəsi təyin edib.
2-ci ordu korpusuna komandirlik də edən Surət Hüseynov oktyabrın 8-də Azərbaycanın Milli Qəhrəmanı fəxri adına layiq görülüb.
1993-cü ilin qışında siyasi hakimiyyətlə Surət Hüseynov arasında ziddiyyətlər yaranıb. Fevralın 17-də Surət Hüseynov baş nazirin müavini, prezidentin Qarabağ bölgəsi üzrə fövqəladə səlahiyyətli nümayəndəsi vəzifəsindən azad edilib. Korpus komandirliyini də təhvil verən Surət Hüseynov martın 4-də “Azəryunsənaye” Dövlət Şirkətinin prezidenti təyin olunub.
İyunun 4-ü Gəncədə siyasi hakimiyyətə hərbi qiyam qaldırılıb. Surət Hüseynovun başçılıq etdiyi qiyam hakimiyyətin dəyişməsi ilə nəticələnib, iyunun 15-də Heydər Əliyev parlament sədri seçilib, iyunun 24-dən prezident səlahiyyətlərini də icra edib.
İyunun 30-da Surət Hüseynov baş nazir vəzifəsinə gətirilib.
1994-cü il oktyabrın 4-də Surət Hüseynova yaxın çevrənin Gəncə şəhərində hərbi qiyama cəhd etdiyi bəyan olunub.
Oktyabrın 7-də Surət Hüseynov baş nazir vəzifəsindən azad edilib.
Oktyabrın 14-də parlament Surət Hüseynovun cinayət məsuliyyətinə cəlb olunmasına, barəsində həbs qətimkan tədbiri seçilməsinə razılıq verib.
Oktyabrın 30-da Surət Hüseynov Azərbaycanın Milli Qəhrəmanı adından məhrum edilib.
1997-ci ildə Surət Hüseynov Rusiyada həbs olunaraq Azərbaycana təhvil verilib, 1999-cu il fevralın 10-da ömürlük azadlıqdan məhrumetmə cəzasına məhkum olunub.
2004-cü il martın 17-də prezident İlham Əliyev Surət Hüseynovu əfv edib.
