Veteranın təhsil xərcini dövlət ödəyəcək
Prezident İlham Əliyev bəzi kateqoriyadan olan şəxslərin təhsil xərclərinin dövlət büdcəsi hesabına ödənməsini nəzərdə tutan 18 mart 2014-cü il sərəncamını yeniləyib. İyulun 27-də imzalanan sərəncamla Azərbaycanın ali təhsil müəssisələrində bakalavriat və magistratura (əsas (baza ali) tibb təhsili və rezidentura) təhsil səviyyələrində və orta ixtisas təhsili müəssisələrində ödənişli əsaslarla təhsil alan, Azərbaycanın ərazi bütövlüyü uğrunda döyüş əməliyyatlarında iştirak etdiyinə görə “Müharibə veteranı” adı almış şəxslərin təhsil müddəti ərzində təhsil haqqı 2023/2024-cü tədris ilindən dövlət büdcəsi vəsaiti hesabına ödənəcək.
2014/2015-ci tədris ilindən qüvvədə olan normanın yeni redaksiyasına görə, Azərbaycanın ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş və Azərbaycanın azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və rəsmən ölmüş elan edilən vətəndaşların Azərbaycanın ali təhsil müəssisələrində bakalavriat və magistratura (əsas (baza ali) tibb təhsili və rezidentura) təhsil səviyyələrində və orta ixtisas təhsili müəssisələrində ödənişli əsaslarla təhsil alan uşaqlarının təhsil müddəti ərzində təhsil haqqı dövlətin boynuna düşür.
Hər iki ödəniş Nazirlər Kabinetinin təsdiq etdiyi təhsil xərcləri miqdarında olacaq.
Sərəncam 2023-cü il sentyabrın 1-dən qüvvəyə minir.
